Юпа уйăхĕн 26-мĕшĕнче Чăваш Республикин Пуçлăхĕ Михаил Игнатьев чăваш наци конгресĕн 8-мĕш съездне хутшăннă. Паллă уяв К.В.Иванов ячĕллĕ Чăваш патшалăх академи драма театрĕнче иртнĕ. Чăваш Республикин культурине тата унăн аталанăвне сыхласа хăварассипе ĕçлекен организацин пысăк пĕлтерĕшлĕ мероприятине Чăваш Республикин Патшалăх Канашĕн Председателĕ Юрий Попов, Министрсен Кабинечĕн членĕсем, делегатсем тата сумлă хăнасем Раççей Федерацийĕн 26 субъектĕнчен, çавăн пекех Эстони, Франци, Украина, Казахстан тăрăхĕсенчен килсе çитнĕ. Михаил Игнатьев хăйĕн сăмахĕнче ытти регионсенчен, çĕр-шывсенчен пархатарлă та ырă чăваш çĕрĕ çине килсе çитнĕ хăнасене чĕререн, ăшшăн саламланă. Республика Пуçлăхĕ юлашки çулсенче демографи лару-тăрăвĕ курăмлăнах ырă енне улшăннине асăннă, пурăнакан халăхăн пурнăç шайне улăштарас тесе, чăваш чĕлхипе культурине аталантарас, регионсемпе тата нацисем хушшинчи çыхăнăва çирĕплетес тесе Чăваш Ен Правительстви тĕрлĕ мерăсем йышăннине палăртнă. Уйрăмах культура проекчĕсене пурнăçлас, литературăпа художество кăларăмĕсене пичетлес енĕпе патшалăх тухăçлă пулăшу кÿнине асăннă. Тăватă томлă Чăваш энциклопедийĕ, 32 пин ытла сăмахран тăракан икĕ томлă «Вырăсла-чăвашла» словарь кун çути курнине, 2011 çултан пуçласа Чăваш Республикин официаллă Порталĕ чăваш чĕлхипе йĕркеленнине палăртса хăварнă. Республикăра юлашки çулсенче тулашри чăвашсемпе çыхăнăва упрас тата аталантарас тĕлĕшпе нумай ĕç туса пынине те палăртнă. Чăваш Ен Пушкăртстанпа, Тутарстан Республикипе, Чĕмпĕр тăрăхĕпе пĕрле килĕштерсе ĕçлемелли çинчен килĕшÿ çирĕплетнĕ. Пĕлтĕр тата кăçал пĕр-пĕрин çĕрĕнче чăваш тата пушкăрт кунĕсене ирттернĕ. Чăваш халăхĕ пурăнакан ытти тăрăхсенче те çак ырă ĕçе малашне те туса пырасси çинчен шантарсах каланă. Михаил Игнатьев хамăр халăхăн моральпе кăмăл-сипетĕн тĕп паллисене — чĕре ăшшине, ырă та тÿрĕ кăмăллăха, тимлĕхе, ытти халăхсене хисепленине, хăй пурнăçне ыттисемшĕн пама хатĕр пулнине — «чун экологине» — чун тасалăхне упраса пыма тата çÿлĕрех шая çĕклеме чĕнсе каланă. Хамăршăн, ачасемшĕн, чăваш халăх пуласлăхĕшĕн пĕрле ĕçлемеллине палăртнă. Чăваш Республикин Пуçлăхĕн Указĕпе килĕшÿллĕн воспитани тата педагогика ĕçĕнче пысăк ĕçсем туса пынишĕн «Чăваш Республикин тава тивĕçлĕ учителĕ» хисеплĕ ята Шупашкарти 20 "-лĕ пĕтĕмĕшле пĕлÿ паракан вăтам шкулĕн вĕрентекенне Валентина Лисицынана парса чысланă. Чăваш наци культурине аталантарас ĕçре пысăк витĕм кÿрсе тата ăна аталантарассишĕн ĕçленĕшĕн Чăваш наци конгресĕн членĕсене Геннадий Александрова, Антонина Карповăна, Михаил Пчелкина тата Галина Рыбалковăна тав çырăвĕ парса хавхалантарнă. Мероприятие хутшăннисене Чăваш Республикин Патшалăх Канашĕн Председателĕ Юрий Попов ăшшăн саламланă. Чăваш наци конгресĕн 8-мĕш съезчĕн кун йĕркине кĕртнĕ тĕп ыйтупа унăн председателĕ Геннадий Архипов калаçнă. Чăваш наци конгресĕн вице-президенчĕ, Чăваш Республикин Патшалăх Канашĕн депутачĕ Николай Угаслов организаци Президиумĕн малашнехи ĕçĕ-хĕлĕсем çинчен чарăнса тăнă. Съездра Чăваш наци конгресĕн регионсенчи уйрăмĕн представителĕсем тухса калаçнă. Сумлă хăнасем регионсенчи уйрăмсемпе патшалăх влаçĕсем, вырăнти хăй тытăмлăх влаç органĕсемпе тата çамрăксемпе тачă çыхăнса ĕçлесси тата чăваш наци культурипе унăн чĕлхе аталанăвĕн, йăли-йĕрки, пĕтĕм çĕр-шыври чăваш халăхĕсен çыхăнăвĕсем çинчен чарăнса тăнă. Тухса калаçакансем регионсем хушшинчи социаллă экономика çыхăнăвне çирĕплетессинче чăваш наци пĕрлешĕвĕсен витĕмлĕхне вăйлатасси пирки палăртса хăварнă.

Съездра Чăваш наци конгресĕн çитес тăватă çуллăхра ĕçлемелли çĕнĕ ушкăнне суйласа хăварнă. Унăн Президенчĕ пулма Чăваш Республикин Патшалăх Канашĕн депутатне Николай Угаслова çирĕплетнĕ.