«Хăнăхнă, килĕшекен ĕç пĕрре те йăлăхтармасть. Унта вăхăт иртни те сисĕнмест. Выльăхсем вĕсем — ачасем пекех, ачашлăха юратаççĕ», — терĕ «Восток» ял хуçалăх производство кооперативĕнче тăрăшакан Антонина Порфирьева. Вăл кунта 1975 çултанпах дояркăра тăрăшать.

Халĕ ЯХПКра вĕсем — çиччĕн. Сĕт сăвакансене талăкра икĕ хутчен — ирхине 6 сехетре, каçхине 5-ре — Николай Хлебников водитель УАЗ маркăллă автомашинăпа ялтан фермăна çитерет.

Паянхи кун Антонина Порфирьева доярка 38 ĕне сăвать. Октябрĕн 1-мĕшĕ тĕлне кашни ĕнерен вăтамран 4273-шер килограмм сунă та. Камшăн мĕнле те, тăрăшуллă хĕрарăмшăн хĕвел тухиччен вăранасси, кунсерен ирпе-ирех ĕçе васкасси нихăçан та йывăрлăх кăларса тăратман. «Делаваль» сĕт сăвакан аппарат ăста доярка аллинче вылянать кăна. Кашни ĕнерен вăл вăтамран 5 минут хушши сĕт сăвать. Ачасем пекех, юратнă ĕнисем те пур унăн: «Белка», «Алина», «Марта» тата ытти те.

Республикăра кăçалхи 9 уйăхра сăвăм кăтартăвĕ те пĕлтĕрхинчен 8,3 процент чакнă. Çак тапхăрта шурă ылтăн 340,1 пин тонна туса илнĕ.

«Ун аллинче ĕç вĕрет»,— теççĕ ĕçтешĕсем Антонина Николаевна пирки. Вăл, ĕçре вăр-варскер, пурне те пулăшма тăрăшать, вăхăтлă сĕнÿ-канаш та парать. Ахальтен мар ĕнтĕ пултаруллăскере иртнĕ çул Чăваш Республикин Ял хуçалăх министерствин Хисеп грамотине парса чысланă.

Юлашки пилĕк çултине танлаштарсан кăçал ĕнесен тухăçлăхĕ япăхланнă. Тăхăр уйăхра республикăра кашни ĕне пуçне 3503 килограмм сĕт сунă (пĕлтĕр — 3567). Çав хушăрах 8 районта, вĕсен шутĕнче пирĕн район та, тухăç ÿссе пыни палăрать.

Калаçăва В.Михеев председатель те хутшăнчĕ.

«Выльăх апачĕ Раççейре хаклансах пырать. Патшалăх малашне сĕт-çу отрасльне хисеплемесен пуяннисем кăна сĕтпе киленме пултарĕç. Ыттисем вара типĕтнĕ сĕтпе хутăштарнă шывпа е чи йÿнĕ шутланакан пальмăпа кокос çăвĕсенчен хатĕрленĕ çимĕçпех çырлахĕç. Пирĕн сĕт пысăк пахалăхлă пулнине çирĕплетме те кирлĕ мар. Раççейре сĕт отрасльне аталантарма тăкакăн 10 процентне кăна саплаштараççĕ пулсан, Белоруссире патшалăх уйăракан субсиди тăкакăн 30 процентне хуплать, Евросоюзра — 40-45 процент. Енчен те малашне те çаплах пулсан, ял сĕчĕ деликатеса тухать», — терĕ Валерий Геннадьевич, ял хуçалăх пуласлăхĕшĕн куляннине пытараймасăр.

«Восток» ЯХПК-ра паянхи куна пăру пăхакансем 8-ăн ĕçлеççĕ: Раиса Гладкина, Вяче-слав Васильев, Валентина Школьникова, Венера Львова, Ольга Малышева, Наталия Михеева, Валентина Морозова тата Надежда Ершова.

М.ИЛЛАРИОНОВА.