Чăваш Республикинче универсаллă электрон карттипе усă куракансен хисепĕ ÿссех пырать. Республикăра юлашки 10 кунра кăна карттă илес текенсен шучĕ 2200 çынпа танлашнă. Сăмах май, паянхи куна ăна илме пурĕ 7200 çын заявлени панине шута илнĕ. 1300-шĕ УЭК-не алла илнĕ те.

Республикăна килекен федераллă универсаллă электрон карттисенче хальхи вăхăтра идентификаци (СНИЛС) тата банк (ОМС) хушăмне палăртнă. 2013 çулхи ака уйăхĕн 1-мĕшĕнчен унта регионра çирĕплетнĕ транспорт хушăмне те кĕртнĕ.

Хăвăрăн кăмăлăр пулсан универсаллă электрон картти çине электронлă цифра мелĕпе алă пусма та пулать. Универсаллă электрон карттипе усă курма ыйтса çырнă чухне хăвăрпа пĕрле паспорт, патшалăх пенси страхованийĕн свидетельстви (СНИЛС), медицина страхованийĕн полисĕ кирлĕ. Вăл 20 ĕç кунĕнче хатĕр пулмалла.

(ХАМĂР ИНФ.).