Пирĕн çĕр-шывра 2012 çултанпа çут тĕнчене килнĕ 500 грамран ытларах таякан, 22 эрне амăшĕн чĕри айĕнче пулнă пепкесене те регистрацилеççĕ. Сăмах май, тĕнчере çулсерен 15 млн ача вăхăтсăр, палăртнинчен маларах, çут тĕнчене килет. Статистика палăртнă тăрăх, çут тĕнчене вăхăтсăр килнисем хушшинче талантлă, тĕнчипе паллă çынсем йышлă. Вĕсем: Исаак Ньютон — 1370 грамм, Марк Твен — 2268 грамм. Çавăн пекех палăртнинчен маларах Анна Павлова, Пабло Пикассо, Наполеон Бонапарт, Виктор Гюго, Огюст Ренуар тата ыттисем те кун çути курнă. 2009 çултанпа ноябрĕн 17-мĕшĕнче Пĕтĕм тĕнчери палăртнинчен маларах (сахал виçепе) çуралнисен кунне паллă тăваççĕ. 2010 çулта çакна Европăри 12 çĕр-шывра та паллă тунă. Сăмах май, çак кун пирĕн çĕр-шывра неонатологсем тĕрлĕ çĕрте тĕл пулусем ирттернĕ, технологи çитĕнĕвĕсемпе те паллаштарнă. Пирĕн çĕр-шывра та çак кунсенче Раççей Федерацийĕн Сывлăх сыхлавĕн министерстви пулăшнипе акци иртет. Акă, иртнĕ кунсенче пирĕн республикăра ятарлă транспорт тытăмĕ «Жираф-Омнимед-Шаттл» аппарат туяннă. Ку вăл сахал виçепе, палăртнинчен маларах çуралнисемшĕн калама çук пысăк пулăшу. Сывлăх сыхлавĕн тытăмĕн ĕçченĕсем палăртнă тăрăх, хальлĕхе пирĕн пата илсе килнĕ çакăн пек аппарат пирĕн çĕр-шывра — пĕрремĕш. А.КОЗЛОВА.