Ноябрĕн 20-мĕшĕнче Комсомольскинчи культурăпа кану центрĕнче Раççейри Амăшĕн кунне халалланă уяв иртрĕ. Чи малтанах РФ Пенси фончĕн Комсомольски районĕнчи управленийĕн начальникĕ, районти ашшĕсен канашĕн председателĕ Сергей Горбунов тата хĕрарăмсен канашĕн ертÿçи Валентина Курицына амăшĕсене, асламăшĕ-кукамăшĕсене праçник ячĕпе ăшшăн саламларĕç, ырлăх-сывлăх, вăрăм кун-çул тата ачисемпе мăнукĕсенчен пархатар курма сунчĕç. РФ Пенси фончĕн Комсомольски районĕнчи управленийĕн начальникĕ Сергей Горбунов виçĕ çемьене амăшĕн капиталĕн сертификатне парса чысларĕ. Анастасия Дмитриевăпа (Хирти Выçли) Мария Хайбуллина (Урмаел) иккĕмĕш ачисене çуратнă, Оксана Муравьеван (Комсомольски) пĕчĕк ывăлĕ вара — çемьере виççĕмĕш. Сăмах май, 2007 çултанпа, асăннă саккун ĕçлеме пуçланăранпа, районти 1167 çемье амăшĕн капиталĕн сертификатне илнĕ, 781 çемье (67 процент) унпа усă курма та ĕлкĕрнĕ. Çĕр çинчи чи хаклă, çывăх çынсен ячĕпе Комсомольски 1-мĕш вăтам шкулĕн 1—9-мĕш класĕсенче вĕренекенĕсем концерт кăтартрĕç. 2-мĕш «в», 3-мĕш «б» тата 1-мĕш классен ачисен интереслĕ ташшисем куракансен кăмăлне кайрĕç. Ксения Гришина, Юлия Львова, Александра Сушенцова, Кристина Павлова шăрантарнă юрăсем илемлĕ янăрарĕç.