Декабрĕн 17-мĕшĕнче Чăваш Ен наци телерадиокомпанийĕн 100,3 FM хум çинче «Тăван радио» калаçма пуçларĕ. Унпа Чăваш Республикин Пуçлăхĕ Михаил Игнатьев Патшалăх Канашне янă Çырăва тÿрĕ эфирта итленĕ. Аса илтеретпĕр, «Тăван радиона» Чăваш Республикинчи наци радионе итлекенсем йышлăрах пулччăр тесе эфира кăларма йышăннă. Юлашки вăхăтчен наци радиовне 105 FM тата 72,41 УКВ хумсем çинче районсенче пурăнакансем çеç итлесе киленетчĕç. Шупашкар тата Çĕнĕ Шупашкар хулисенче пурăнакансем ăна илтмен. Халĕ вара «Тăван радио» калаçма пуçласан Чăваш Республикинче пурăнакан кашни çын унăн сассине илтме пултарĕ.

Çитес çулхи январь уйăхĕнчен радио талăкĕпех калаçĕ. Эфирта чăвашла тата вырăсла хыпарсем, обществăпа политика, аталану, интерактивлă программăсем пулĕç. Ирхи блокра (6 сехетпе 9 сехетчен) «Тăван микс утро» программа эфира тухĕ. Унта чăвашла, вырăсла савăк юрăсем янăрĕç. Çавăн пекех радиоспектакльсем, кон-цертсем итлесе киленме май пулĕ.