Чăваш Енре пурăнакан 41 пин çын Пĕрлехи патшалăх порталĕнче хăйсен пÿлĕмĕсене уçнă. 2013 çулта вĕсем электрон мелпе усă курса тĕрлĕ ведомствăсене 58 пине яхăн ыйту янă. Вĕсенчен 46 пинĕ — федераци ведомствисене, регионтисене — 12 пин, муниципалитетсене — 430 ыйту.

ЧР Информаци политикин тата массăллă коммуникацисен министерстви уйăхсерен ирттерекен мониторингпа килĕшÿллĕн декабрь уйăхĕнче электрон мелпе регионти пулăшупа усă курма 2 пин хутчен ыйту çырнă. Çынсем ытларах ЗАГС пайне заявлени çыраççĕ тата ĕç шыраççĕ. Пĕрлехи патшалăх порталĕпе усă курса регионти 69 пулăшупа усă курма пулать. Çавăнпа та килтенех медицинăра ĕçлеме лицензи илме, аптекăсене электрон рецепчĕ яма, ачана уйăхсерен паракан пособи валли документсем хатĕрлеме, ача садне черете тăма, ача усрава илме, пурăнмалли çурт-йĕре пурăнмалла мар çурт-йĕре куçарма е пурăнман çурта пурăнмаллине куçарма тата ыттине те çăмăллăнах пурнăçлама май пур. Ăна тума Пĕрлехи патшалăх порталĕнче регистрациленсе уйрăм пÿлĕмре ĕçлеме код илмелле.