Январĕн 18-мĕшĕнче К.В.Иванов ячĕллĕ Чăваш патшалăх академи драма театрĕнче Раççей тата Чăваш пичечĕн кунне халалласа савăнăçлă уяв иртрĕ. Журналистсемпе полиграфистсене, пичет ĕçченĕсемпе ветерансене саламлама республика Пуçлăхĕ, министрсем, депутатсем тата тĕрлĕ предприятисен ертÿçисем çитрĕç. Хăнасем малтанах массăллă информаци хатĕрĕсенче тимлекенсем хăйсен çитĕнĕвĕсем çинчен хатĕрленĕ курава тăратнă ĕçсемпе паллашрĕç.

Чăваш Республикин Пуçлăхĕ Михаил Игнатьев пичет ĕçченĕсене професси уявĕ ячĕпе саламларĕ, тăван республикăшăн ырми-канми юратса ĕçленĕшĕн тав турĕ. Михаил Васильевич Чăваш Енри хăш-пĕр МИХсенче тимлекенсене патшалăх наградисене парса чысларĕ.

Отраслĕн 2013 çулхи ĕç-хĕлне ЧР информаци политикипе массăллă коммуникацисен министрĕ Валентина Андреева пĕтĕмлетрĕ. Иртнĕ çул чăваш МИХĕсемшĕн ăнăçлă пулнине, çакна редакцисемпе журналистсем илнĕ наградăсен шучĕ те çирĕплетсе панине палăртрĕ, малашне те ăнăçусем сунчĕ.

РФ Патшалăх Думин депутачĕ Анатолий Аксаков, ЧР Патшалăх Канашĕн председателĕн çумĕ Олег Мешков та журна- листсен ĕçне пысăк хак пачĕç.

Малта пыракан массăллă информаци хатĕрĕсене тата журналистикăра пултаруллисене Чăваш Республикин Информаци политикипе массăллă коммуникацисен министерствин дипломĕсемпе чысларĕç. Йышлă номинацисенчен пĕри — «Халăх корреспонденчĕ». Çак хисеплĕ ята пуçласа енте-шĕмĕр, «Каçал ен» хаçатăн обществăлла корреспонденчĕ Р.П.Моисеев тивĕçни пире уйрăмах савăнтарать. Ревокат Прохорович — район хаçачĕн хастар тусĕ, СССР Журналистсен союзĕн членĕ, Аслă Аттелĕх вăрçин участникĕ. 92 çулти ветеран паян та сывă пурнăç йĕркине тытса пурăнать, çавăнпа унăн райхаçатра пичетленекен материалĕсенчен ытларахăшĕ те асăннă темăпа çыхăннă.

Професси уявне «Каçал ен» Комсомольски район хаçачĕ» хăй тытăмлă учрежденинче тăрăшакансем те хутшăнчĕç, ытти районсенчи ĕçтешĕсемпе курса калаçрĕç, пĕр-пĕрин ĕç-хĕлĕпе кăсăкланчĕç. Пирĕн редакци те курава хăй кăларакан продукцие — «Каçал ен» тата «Вакыт» хаçатсене — тăратрĕ.

Пичет кунĕ республикăри творчество коллективĕсем хатĕрленĕ уяв концерчĕпе вĕçленчĕ.

Л.ШУРЯШКИНА