Чăваш Республикин Наци библиотеки, Чăваш патшалăх эксперименталлă драма театрĕн артистки Елена Светлая маттур хĕрарăмсем валли «Таланты женщины не ведают границ — 2014» черетлĕ проект пуçланни пирки пĕлтереççĕ.

Проект тĕллевĕ -— Чăваш Енре пурăнакан пултаруллă та маттур хĕрарăмсене тупса палăртасси, вĕсемпе ыттисене паллаштарасси.

Асăннă проект пуçласа 2011 çулта иртнĕ. Ун чухне Елена Светлая маттур та вăр-вар, ырă кăмăллă, пуян чун-чĕреллĕ хĕрарăмсемпе — библиотека ĕçченĕсемпе, блогерсемпе, бизнес-ледисемпе, сăн ÿкерекенсемпе, учительсемпе, кил хуçи хĕрарăмĕсемпе — паллаштарнă.

Кăçалхи проекта хутшăнас текенсен хăйсен чун киленĕçĕ пирки каласа памалла, ăсталанă япаласемпе паллаштармалла. Анчах та ĕçпе хобби пĕр пулмалла мар.

Проекта хутшăнас текенсем информацие ЧР Наци библиотекин сайтĕнче тупма пултараççĕ. Унта хĕрарăмсем тăратнă чи лайăх заявкăсемпе те паллашма май пулĕ. Заявкăсене февралĕн 3-мĕшĕнчен мартăн 3-мĕшĕччен йышăнаççĕ. Электрон адрес: lenasvet@mail.ru.

Маттур, ĕçчен, тĕрлĕ япала ăсталама, тĕрлеме, çыхма, çĕлеме, ÿкерме пĕлекен хĕрарăмсем пирĕн районта та сахал мар. Апла пулсассăн эсир проекта хутшăнасси иккĕлентермест.