Мартăн 15-мĕшĕнче Аслă Çĕрпỹел ялĕнче пурăнакан Лидия Константиновна Гаврилова 100 çулхи юбилейне паллă турĕ. Пĕр ĕмĕрхи уявпа кинемее район администрацийĕн пуçлăхĕ М.Р.Афанасьев, Аслă Çĕрпỹел ял тăрăхĕн пуçлăхĕ Г.Г.Ракчеев тата çывăх тăванĕсем саламларĕç. Михаил Романович Раççей Президенчĕ Владимир Путин янă Тав çырăвне вуласа пачĕ, малашне те çирĕп сывлăх, вăрăм ĕмĕр, канлĕ ватлăх сунчĕ, чечек çыххипе парне парса чысларĕ. - Лидия Константиновна, эсир пирĕншĕн тĕслĕх вырăнĕнче. Пурнăçра нумай йывăрлăха çĕнтерсе 100 çула çитме пултартăр. Эпир сирĕнпе мухтанатпăр, сывлăху ан хавшатăр, мăнукăрсемпе тăванăрсен чун-чĕре ăшшине туйса тăрăр, малашне те сирĕн килте килĕшỹ хуçалантăр, - терĕ Геннадий Герольдович ватăна саламласа. Кинемее юбилейпе саламлама тăван шăллĕ те, 83 çулхи Николай Константинович, килнĕ. Пĕр тăвансем савăнăçне те, хуйхине те яланах çурмаран пайлаççĕ, пĕр-пĕринпе тĕл пулма, калаçса ларма вăхăт тупаççĕ. Пĕрле савăннине мĕн çиттĕр? Паянхи кун Лидия Константиновна çумра кинĕ, Зинаида Петровна, мăнукĕсем, вĕсен ачисем пуррипе савăнать. Вĕсем асламăшне чунтан юратаççĕ, хисеплеççĕ, яланах пулăшас тесе тăрăшаççĕ. Лидя аппа юбилейпе саламлама килнĕ хăнасене чĕререн тав турĕ. Иртнине аса илсе куççульленмесĕр чăтаймарĕ кинемей. Унăн пурнăçĕ çăмăл килмен, ĕмĕр тăршшĕпе хуйхине, терт-нушине пайтах курнă. Вăл пуçне усман, çутă малашлăх пирки ĕмĕтленнĕ. - Пурнăç урапи çаврăнать. Пĕр ĕмĕр пурăнса темĕн те куртăм. Паян савăнса пурăнма пурте пур: кил-çуртра ăшă, хăтлă, апат-çимĕçĕ çителĕклĕ. Сире телей, ăнăçу, вăрăм ĕмĕр сунатăп, - терĕ Лидия Константиновна пурне те тав туса.

А.ИВАНОВ.