Халăх хушшинче кĕнеке вулассине аталантарас тата писатель-поэтсен кĕнекисене анлă сарас тĕллевпе Чăваш наци библиотеки пуçарнипе республикăри библиотекăсем хушшинче кашни çулах "Литературăллă Чăваш Ен: 2012 çулта чи вуланакан кĕнеке" конкурс иртет. Кăçалхипе ăна 11-мĕш хут йĕркелерĕç. Конкурса районти библиотекăсем те хастар хутшăнчĕç, тĕрлĕ мероприятисем ирттерчĕç. Районти тĕп библиотека ĕçе пĕтĕмлетсе ятарласа альбом хатĕрлерĕ. Пурнăçланă ĕçсене уçăмлăн çутатса пама тăрăшрĕ. Районти тĕп библиотека "Книжная столица" номинацире çĕнтерчĕ. Çавăн пекех Комсомольски 1-мĕш вăтам шкулĕн 8-мĕш класĕнче пĕлỹ пухакан Лиза Зайцева "Лидер чтения" пулса тăчĕ. Хырай Ĕнел ялĕнче пурăнакан чи активлă вулакан Анфиса Ильинична Ласточкина та сумлă парнене тивĕçрĕ.

     Çĕнтерỹçĕсене, кĕнеке тусĕсене апрелĕн 18-мĕшĕнче Чăваш наци библиотекинче чысларĕç. Хаклă парнесем тата Хисеп грамотисем парса хавхалантарчĕç. Уяв вăхăтĕнче Лиза Зайцева Светлана Гордееван сăввисене пăхмасăр каласа пачĕ. Залра ларакансем ăна тăвăллăн алă çупса тав турĕç. Районти маттур çынсем республикăра палăрни уйрăмах савăнтарать. Кунта, паллах, вулакансемпе библиотекарьсен маттурлăхне палăртса хăвармалла. Ĕçри ỹсĕмсем малашне те тăрăшма вăй-хал параççĕ. Вулакансене вара çакна сĕнес килет: килĕр, вулăр, конкурссене хутшăнăр, эсир те çĕнтерме пултаратăр.