"Çемье фермисене аталантарасси" тата "Ĕçе пуçăнакан фермерсене пулăшасси çинчен" конкурссене эффективлă ирттерессипе Чăваш Ен федераци шайĕнче лайăх регионсен йышĕнче пулнине палăртнă.

     Апрель уйăхĕнче Раççей Федерацийĕн субъекчĕсенче ĕçе пуçăнакан фермер (хресчен) хуçалăхĕсене, çемье фермисене аталантаракансене, 2014 çулта грант илекенсене тупас енĕпе конкурс мероприятийĕсем ирттерме пуçланă.

    Раççей Ял хуçалăх министерстви конкурссене тухăçлă ирттерессипе ĕçлекен лайăх регионсен йышне Çурçĕр-Осети - Алани, Тутарстан, Чăваш Республикисене, Ленинград, Вологда, Сахалин, Калуга облаçĕсене, Алтай крайне кĕртнĕ. Ку регионсенчи фермер-çĕнтерỹçĕсем кăçалхи май-июнь уйăхĕсенче грантсем илĕç.

    Камчатка крайĕнче, Волгоград тата Свердловск облаçĕсенче ку ĕçе пуçăнман та. Чăваш Енре "Çемье фермисене аталантарасси" конкурса хутшăнас текенсенчен документсене йышăнассине апрелĕн 7-9-мĕшĕсенче вĕçленĕ.

    ЧР ял хуçалăх министрĕ Сергей Павлов конкурс комиссине ертсе пырать. Калаçура вăл фермерсен тăрăшулăхне хаклать. Конкурс комиссине документсен 32 пакетне тăратнă, ку вăл пĕлтĕрхинчен 9 заявка ытларах. Иртнĕ кунсенче комисси Пăрачкав, Патăрьел, Улатăр тата Комсомольски рай-онĕсенчи фермерсен конкурса тăратнă ĕçĕсене пăхса тухнă, вĕсемпе тĕл пулса калаçнă.

    Конкурс пĕтĕмлетĕвĕсемпе баллсем шутлаççĕ, комиссин протоколне хатĕрлеççĕ. Пĕтĕмлетỹсене фермерсене пĕлтереççĕ, Чăваш Республикин Ял хуçалăх министерстви çĕнтерỹçĕсемпе патшалăх пулăшăвĕ пама килĕшỹ тăвать.

   Çак программа виççĕмĕш çул ĕçлет. 2012-2013 çулсенче Чăваш Енре 10 фермера патшалăх пулăшăвĕ панă. Кăçал çак тĕллевпе федераци бюджетĕнчен - 16,5 млн, республика бюджетĕнчен 11,9 млн тенкĕ уйăрнă. Пулăшăва кăçал 6-7 фермер тивĕçме пултарнине палăртнă министр. Субсидин вăтам виçи 5 млн тенке яхăн пулĕ.

   Çак конкурс вĕçленсен комисси ĕçе пуçăнакан фермерсене суйлама тытăнĕ. Конкурса хутшăнас текенсем Ял хуçалăх министерствине документсен 156 пакетне пăхса тухма тăратнă. Çакă 2013 çулхинчен 42 заявка ытларах.