Каçал тăрăхĕнче маттур, пултаруллă, ăслă, пуçаруллă, хастар çынсем сахал мар çитĕннĕ. Раççей, республика, район шайĕнче палăрнăскерсене пурте ятран пĕлеççĕ, хисеплеççĕ, асра тытаççĕ. Вĕсен çул-йĕрне суйласа илекенсем татах та пулччăр. Василий Петрович Разумов вице-адмирала пĕлмен çын пирĕн тăрăхра çук. Унăн çутă сăнарне Аслă Çĕрпỹел ял тăрăхĕнче пурăнакансем асра тытаççĕ, унпа мухтанаççĕ, çамрăксем ун пек пулма тăрăшаççĕ.

       Вице-адмирал, çар флочĕн инженер-начальникĕн çулĕпе утас пулсассăн сахал мар вăй хумалла, тăрăшса вĕренмелле, чăрмавсене çĕнтерсе малалла утмалла. Василий Петрович Разумов Аслă Çĕрпỹел ялĕнче 1909 çулхи апрелĕн 30-мĕшĕнче çуралнă. Вăл - Тинĕс-çар флочĕн паллă инженерĕ, Аслă Отечественнăй вăрçă участникĕ. Ĕçри ỹсĕмсемшĕн ăна нумай орден-медальпе наградăланă. Вăрçă вăхăтĕнче иккĕмĕш рангри капитан-инженер флотра службăра тăнă шыв çийĕн тата шыв айĕн çỹрекен карапсен электромеханика оборудованийĕсене юсанă, карапсен корпусĕсене пăхса тăнă. Опытлă специалиста Аслă Отечественнăй вăрçăн I степеньлĕ орденĕпе наградăланă. Нумай çул тăрăшуллă ĕçленĕшĕн Василий Разумова Хĕрлĕ Ялав, Ĕçлĕх Хĕрлĕ Ялавĕ, Хĕрлĕ Çăлтăр орденсемпе, "Çарти çитĕнỹсемшĕн", "Японие çĕнтернĕшĕн" медальсемпе чысланă.

      Аслă Çĕрпỹел ял тăрăхĕнче пурăнакансем паттăр ентеше асра тытаççĕ. Унăн ячĕпе урам хисепленсе тăни, вăл пурăннă çурт вырăнĕнче асăну хăми пурри çакна çирĕплетет. Апрелĕн 30-мĕшĕнче, пурăннă пулсассăн, Василий Разумов çав кун 105 çул тултарнă пулĕччĕ, Кĕçĕн Çĕрпỹел вăтам шкулĕнче савăнăçлă лару-тăрура унăн ячĕпе асăну хăми уçрĕç. Савăнăçлă мероприятие район администрацийĕн пуçлăхĕ Михаил Афанасьев, Аслă Çĕрпỹел ял тăрăхĕн пуçлăхĕ Геннадий Ракчеев, Чăваш Республикинчи Тинĕс-çар флочĕн ветеранĕсен союзĕн председателĕ Владимир Крюковский, Патăрьелĕнчи Тинĕс тăванлăхĕн (братство) председателĕ Анатолий Казенов тата ыттисем те хутшăнчĕç. Вĕсем пухăннисене асăну хăми уçнă ятпа саламларĕç, ентеше яланах асра тытнăшăн тав турĕç. Тинĕс-çар флотĕнче службăра тăнисене: Вячеслав Щетинкина, Владимир Михайлова, Евгений Орешкина, Евгений Зимцова "Тинĕс-çар флочĕн ветеранĕ" медальсем парса чысларĕç. Тинĕс-çар флотĕнче службăра тăнисем чăннипех те туслă пулнине, ентешсене асра тытнине, тусĕсене хисепленине тĕслĕхсемпе çирĕплетеççĕ. Вĕсем пур ĕçре те пуçаруллă. Районта моряксен ячĕпе палăк, халĕ Василий Разумов ячĕпе асăну хăми уçăлни вĕсен тăрăшулăхĕсĕр пулман. Çамрăк ăру пултаруллă ентешсене ятран пĕлтĕр, вĕсенчен тĕслĕх илтĕр!