Республика кунĕнче районта "Уй-хир кунĕ - 2014" иртни пирки хаçатра çырса пĕлтернĕччĕ. Çак кун, Р.Хайртдиновăн фермер хуçалăхĕн уй-хирĕнче хăнасем тĕрлĕ ял хуçалăх техникин çĕнĕ моделĕсемпе - комбайнсемпе, тракторсемпе, акмалли, сỹрелемелли, лартмалли, им-çамламалли тата ытти агрегатсемпе паллашнипе пĕрлех, кунти техникăна туянма кăмăл тунă. Куравра пурĕ 89 миллион тенкĕлĕх килĕшỹ çырнă. "Агротехкомплект" ОООпа 3 комбайн тата Versatili- 305 трактор туянма килĕшỹ çырнă. Çавăн пекех "РенАвто" ОООн 3 комбайнĕ те малашне Чăваш Ен уй-хирĕнче ĕçлĕ. Вĕсенчен пĕри - "Полесье" - Патăрьел районĕнчи "Исток" агрофирмăра. Пĕрремĕш туянакана "РенАвто" ООО мотороллер парнеленĕ.

Çавăн пекех килсе çитнĕ хăнасемпе уйрăм çынсем хушшинче лотерея вылявĕ ирттернĕ. "Агротехкомплект", "КанмашАгро" ООО-сем, "Август" фирма, "Россельхозбанк" АУОн Чăваш Енри филиалĕ парнесемпе савăнтарнă. Уй-хир кунĕн хăнисем, ЧР ял хуçалăх министрĕ Сергей Павлов, çумĕ Эдуард Александров тата ыттисем "Госсорткомисси" ФПУ сăнав хирĕсенче пулнă. Унта мĕнле вăрлăхсем çитĕнтернипе кăсăкланнă. Асăннă учрежденин сăнав участокĕнче çулсеренех тĕрлĕ культура вăрлăхĕсене çитĕнтерсе сăнаççĕ. Аван тухăçлисене Чăваш Республикинче лартса çитĕнтерме сĕнеççĕ. Сăмахран, кăçал 20 тĕрлĕ çурхи тата 23 тĕрлĕ кĕрхи тулă сорчĕсене акнă. Унпа пĕрлех 13 тĕрлĕ сĕлĕ вăрлăхне тата 17 тĕрлĕ урпана, 19 тĕрлĕ пăрçана, 29 тĕрлĕ кукуруза вăрлăхĕсене тĕпчемелле. 28-шар тĕрлĕ çĕр улмипе купăста вăрлăхĕсем мĕнле çитĕннине те пăхса тăмалла, пĕтĕмлетỹсем тумалла.