ЧР Культура, национальноçсен тата архив ĕçĕн министерстви "2015-2020 çулсенче Чăваш Республикинче ял тата экологи туризмне аталантарассин концепцийĕ" проекта хатĕрлесе çитернĕ. Унпа килĕшỹллĕн тĕп тĕллевсене, ял тата экологи туризмĕн аталанăвне палăртнă. Концепци тĕллевĕсене 3 категорие уйăрнă: экономика, социокультура, экологи. Яллă вырăнсенче культурăпа истори, экологи тата рекреаци ресурсĕсемпе усă курассин витĕмне аталантарас ыйтусене пăхса тухнă.

Концепцие 3 тапхăрпа пурнăçлама палăртнă. Унпа килĕшỹллĕн Чăваш Республикинче ял тата экологи туризмĕ хăвăрт аталанмалла. Сăмахран, 2013 çулта ял хăна çурчĕсем 15 çеç пулнă пулсассăн, 2020 çулта вĕсен шучĕ 100 çурта çитмелле. Çавăн пекех экотуризм объекчĕсен шучĕ 6-ран 30 пулмалла. Çак объектсенче ĕçлекенсен йышĕ те 180 çынран 2020 çул тĕлне 700 çынна çитмелле.

Асăннă проектпа тĕплĕнрех regulations.cap.ru. сайтра паллашма май пур. Проекта валли сĕнỹ парас текенсен çырусене ЧР Культура, национальноçсен тата архив ĕçĕн министерствине августăн 1-мĕшĕччен çак адреспа çитермелле: Шупашкар хули, Президент бульварĕ, 17-мĕш çурт е culture64@cap.ru. электрон почтăна ярса памалла.