Июлĕн 24-мĕшĕнче Мускавра РФ Президенчĕпе Владимир Путинпа Чăваш Республикин Пуçлăхĕ Михаил Игнатьев тĕл пулнă. Чăваш Ен Пуçлăхĕ республикăри социаллă-экономикăллă лару-тăрупа паллаштарнă. Çавăн пекех регионта ача сачĕсене черете тăрассине пĕтерессипе йышăннă мерăсем тата çамрăк çемьесене тивĕçлĕ пулăшу парас енĕпе регионти программăсем епле пурнăçланнине сỹтсе явнă.

Михаил Игнатьев 2012 çултанпа республикăра демографи лару-тăрăвĕ лайăхланнине тата 2013 çултанпа халăх йышĕн хăй тĕллĕн ỹсеслĕхĕ 1027 çын пулнине палăртса хăварнă. Юлашки 2 çулта нумай ачаллă çемьесенчи ачасен шучĕ 11 процент ỹснĕ, çемьесенче 3 тата 4-мĕш ачасем çуралнă.

- Ачасен шучĕ ỹснĕрен ача сачĕсенче те вырăнсем çителĕклĕ кирлĕ. Çавна май çĕнĕ ача сачĕсене хута ярасси пысăк вырăн йышăнать. 2015 çул тĕлне 1,5 çулхи ачасене вырăнсемпе тивĕçтермелле. Паянхи куна 13 600 вырăн пур, çитес вăхăтра, эпир хатĕрленĕ çул-йĕр карттипе килĕшỹллĕн, çĕнĕ йышши ача сачĕсенче тата 6700 вырăн пулмалла.

   Обществăлла-политикăлла лару-тăру та республикăра лайăх: 128 наци çыннисем, 8 этника ушкăнĕ хăйсен йăли-йĕркине çирĕп пăхăнса, культурине тĕпе хурса килĕштерсе пурăнаççĕ.

Çамрăк çемьесене пурăнмалли çурт-йĕрпе тивĕçтерме патшалăхăн 15 программине çирĕплетнĕ. Унпа пĕрлех учительсем, сывлăх сыхлавĕнче ĕçлекенсем валли ипотека кредичĕсемпе усă курма меллĕрех пултăр тесе 4 процентне вырăнти бюджетран субсидилетпĕр. Ялта пурăнакан çамрăк çемьесене тивĕçлĕ пулăшу пама "Яллă вырăнсене аталантарасси" программăпа килĕшỹллĕн 35 çул тултарман граждансене тавăрса памалла мар субсидисем уйăраççĕ. Çавна май ял аталанать, унпа пĕрлех вăтам, пĕчĕк бизнес, ял хуçалăхĕ вăй илет. Ĕç вырăнĕсемпе тивĕçтерессине регионти тата муниципаллă влаç органĕсем, общественноç пулăшнипе тапхăрăн-тапхăрăн пурнăçлĕç.

6 уйăх пĕтĕмлетĕвĕсем хыççăн промышленноç производствин индексĕ 104,7 процентпа танлашнă, çулталăкĕпе 104 процент пулма кирлĕ. Ял хуçалăхĕпе илес пулсассăн, çанталăк условийĕсене пула палăртнине 100 проценчĕпех пурнăçлама май килмерĕ. Строительство комплексĕнче - 112 процент, çĕнĕ çурт-йĕр хута ярассин динамикине ỹстерсе 103-104 процентлăх пурнăçлатпăр. Чăваш Енре пурăнакан кашни çын пуçне 0,7 тăваткал метр çурт-йĕр тăватпăр. Çурт-йĕр тăвассине ỹстересшĕн, мĕншĕн тесен конкуренци кирлĕ, вăтам пурăнакансем туянма пултарччăр. Унпа пĕрлех федераци шайĕнчи программăсене хутшăнатпăр, комплекслă, компактлă çуртсем хăпартнă вырăнсем пур. Инфраструктура валли инвестицисем хывни хаксене сыхласа хăварма пулăшĕ, - пĕлтернĕ Чăваш Ен Пуçлăхĕ Михаил Игнатьев.