Ял хуçалăхĕнче пурнăçламалли кашни ĕçĕн хăйĕн вăхăчĕ пур. Вăхăтра акни, лартни, имçамлани, шăварни, апатлантарни тухăç çине пысăк витĕм кỹрет. Çакна çĕр ĕçченĕсем лайăх пĕлеççĕ. Çавăнпах пулĕ шаннă ĕçе пахалăхлă пурнăçлама тăрăшаççĕ.

"Луч" ял хуçалăх производство кооперативĕнче тăрăшакансем ĕçре вăр-вар та маттур пулнине тĕслĕхсемпе çирĕплетсе параççĕ. Вĕсем вырмана вăхăтра вĕçлес тесе кашни ирех ĕçе пуçăнаççĕ. Çапса тĕшĕлемелли лаптăк 100 гектар ытларах çеç юлнă. Апла пулин те, çанталăк çумăра кайни ĕçе вăхăтра вĕçлеме май памарĕ-ха. Унпа пĕрлех кĕр тыррисене те акма тухнă хуçалăхра. Кăçал Тимĕрчкассисем кĕр тыррисене 200 гектар çинче акма планланă. Паянхи кун тĕлне 50 гектар ытла акса хăварма та ĕлкĕрнĕ. Вĕсен ĕçĕ-хĕлĕпе район администрацийĕн пуçлăхĕ Михаил Афанасьев хăй çитсе паллашрĕ. Мĕнле вăрлăх тата мĕн чухлĕ лаптăк лартма палăртнипе кăсăкланчĕ.

- Кĕрхи тырăсене май килнĕ таран имçамласа акасчĕ тата çак ĕçе вăхăтра пурнăçласчĕ. Вырмана вĕçлемелле, çĕр хатĕрлемелле, - терĕ уй-хир ĕçĕсемпе паллашнă май Михаил Романович.

Кĕр тыррисене акнă çĕрте Юрий Шеверовпа Сергей Петров тăрăшаççĕ, вĕсемех çĕр хатĕрленĕ ĕçре те маттур. Районĕпе пĕрчĕллĕ тата пăрçа йышши культурăсене 14105 гектар çулнă, 30120 тонна çапса тĕшĕленĕ.

"Слава картофелю" агрофирма вырмана вĕçленĕ. 1071 гектарне çулса 2549 тонна пỹлмене кĕртнĕ. 81 гектар çĕр улми лаптăкĕнчен 1382 тонна пуçтарса кĕртнĕ.