Мускав хулинче çулсеренех ял хуçалăх продукцийĕсен регионти фестивальсен ярмăрккине йĕркелеççĕ. Унта Чăваш Республикинчи ял хуçалăх таварĕ туса илекенсем те хутшăнаççĕ. Кăçалхи ярмăркка октябрь вĕçĕчченех пулĕ. Унта хутшăнас текенсен "Чăваш Республикин апат-çимĕç фончĕ" УКПпа çыхăнмалла. Паянхи куна асăннă предприяти Мускава тухса кайма ял хуçалăх продукцине тиенĕ автомашинăсен колоннине йĕркелеме пуçланă.

Чăваш Ен аграрийĕсем ярмăрккана йышлăн хутшăнĕç. Вĕсем хăйсем çитĕнтернĕ продукцине аван хакпа сутасси иккĕлентермест. Çавăн пекех Шупашкар, Улатăр, Канаш, Çĕмĕрле, Çĕнĕ Шупашкар хулисенче "Кĕр пуянлăхĕ - 2014" ярмăрккасем ĕçлеççĕ.