2013 çултанпа РФ Президенчĕ Владимир Путин Аслă Отечественнăй вăрçă участникĕсемпе тыл ĕçчнĕсене юбилейсемпе саламлассине йăлана кĕртнĕ. Çак кунсенче Çĕнĕ Кипеç ялĕнче пурăнакан Елизавета Ильинична Михайлова 95 çул тултарнă ятпа шăпах çак открыткăна алла илчĕ те.

- Ватăсене Владимир Путин саламлани, тав туни савăнтарать. Пирĕн пирки те манмаççĕ-ха тесе шутлатăп, тавах, - тет кинемей куççульленсе. Сентябрĕн 1-мĕшĕнче вара район администрацийĕн пуçлăхĕ Михаил Афанасьев, Хирти Сĕнтĕр ял тăрăхĕн пуçлăхĕ Геннадий Ефремов Елизавета Ильиничнăна саламларĕç, парнесем пачĕç, çирĕп сывлăх, вăрăм ĕмĕр сунчĕç. Пĕр ĕмĕре яхăн пурăнакан кинемей хăйĕн пурнăçĕнче хура-шурне сахал мар курнă, тĕрлĕ саманара пурăннă. Апла пулин те хăйне вăрăм ĕмĕр панăшăн Турра тав тăвать. Ачисемпе, мăнукĕсемпе чунтан савăнать.