Ĕнер, сентябрĕн 19-мĕшĕнче, Чăваш Республикин Пуçлăхĕ Михаил Игнатьев "Сочи - 2014" Пĕтĕм тĕнчери инвестици форумне хутшăннă. Республика Пуçлăхĕ Раççей Перекет банкĕ йĕркеленĕ "Бюджета шайлаштармалла е ỹсĕме хăвăртлатмалла: суйлама вăхăт" ирхи ĕçлĕ апатланăва тата РФ Правительство Председателĕ Дмитрий Медведев тухса калаçнă "Раççей Европăпа Ази хушшинче: регионсенчи хальхи условири çĕнĕ политика" пленарлă канашлăва хутшăннă. Шăпах çак форумра Чăваш Республикипе Севастополь хули тата Ставрополь крайĕ, Ямал-Ненецк автономи округĕ, Раççей Перекет банкĕ хушшинчи пĕр-пĕринпе килĕшсе ĕçлемелли ĕç хутне алă пусса çирĕплетнĕ.

Сентябрĕн 18-мĕшĕнче Чăваш Ен Пуçлăхĕ Михаил Игнатьев Раççей Федерацийĕн Патшалăх Канашĕн ларăвне хутшăннă. Кун йĕркипе килĕшỹллĕн, Раççейри бизнес ыйтăвĕсемпе, çимĕçсене хатĕрлес технологине çĕнетессине, ВТО йĕркине ытларах пăхăнассине, регионсенчи экономикăна çĕклессине, малта пыракан предприятисенче нумай çуллăха йышăннă программăсене пулăшассипе çыхăннă ыйтусене сỹтсе явнă. Раççей Президенчĕ Владимир Путин тĕнче экономикинче юлашки вунă çул хушшинче тарăн ылмашусем пулса иртнине каланă. Предпринимательсен климачĕ тĕпрен çĕнелсе пыни куç кĕретех. Калаçу йĕркеленĕ хыççăн 16 çултан Раççей ВТОна кĕнĕ.

Патшалăх Ертỹçи федераци тата регионсем шайĕнчи влаçсене экономикăн секторне аталантарма витĕм кỹресси, производство тытăмĕнче ĕçлеме пысăк квалификациллĕ специалистсене хатĕрлесси, инфратытăма аталантарасси, кредитсемпе усă курассине анлăрах сарасси пирки сăмах пуçарнă. Чăваш Енре импорт таварĕсен пайĕ пасарта самай ỹсни сисĕнет. Сăлтавĕ "Промтрактор-Вагон", "ТУС" АХПсем, "Хĕвел", "Керамика", "ГиПор-М", "Проектэлектротехника", "Агрохолдинг "ЮРМА" ОООсем, "Акконд", "Букет Чувашии", "Чувашавтодор" АУПсем, республикăри предприятисем ют çĕршывсенчен пысăк технологиллĕ хатĕрсене туяннипе çыхăннă. Импорт пайне сахаллатма палăртнă. Чăваш Республикинче апат-çимĕç таварĕсем пахалăх енчен ыттисенчен лайăхрах та пулнипе уйрăлса тăрать. Унсăр пуçне химипе тимĕр хатĕрĕсенчен калăпланă таварсен пахалăхĕ те пурин кăмăлне çĕклет. Шыв, газ, электроэнерги валеçессипе çыхăннă производство тытăмĕ те курăмлăн ĕçлесе пырать.

Сентябрĕн 12-мĕшĕнче Чăваш Республикин Пуçлăхĕ Михаил Игнатьев тата "Раççей чукун çулĕсем" АУО филиалĕн - Чул хула чукун çулĕсен пуçлăхĕ Анатолий Лесун Канаш хулинчи чукун çул çинче вăй хуракансене хваттерсене куçнă ятпа саламланă. Çав кунах Канашри чукун çул вокзалĕнче Чăваш Республикипе "Раççей чукун çулĕсем" АУО пĕр-пĕринпе килĕштерсе ĕçлесси çинчен калакан нумай çуллăх килĕшĕве алă пуснă. А.Лесун 2013 çулта Чăваш Енри чукун çулсене аталантарма 750 млн тенкĕлĕх инвестици хывнине пĕлтернĕ. ЧР Пуçлăхĕн Михаил Игнатьевăн Чăваш Енре пурăнакансен сывлăхне çирĕплетмелли тата лайăхлатмалли хушма мерăсем çинчен калакан указĕпе килĕшỹллĕн республикăри кашни район администрацийĕ халăха "Сывлăх профилĕ" ыйтăма хутшăнма сĕнет. Ыйтусем çине район администрацийĕсен тата çак сайтра тупса хуравлама пулать: www.cap.ru. Çакă ял тăрăхĕнче пурăнакансен сывлăхĕ çине мĕн витĕм кỹнине палăртма пулăшĕ. Пĕрремĕш хут çак профильпа 2003 çулта Шупашкар хулинче паллаштарнă. Хушнă ĕçе йĕркеллĕ пурнăçласа пырассине Правительство комиссийĕ тĕрĕслесе тăрĕ.