Комсомольскисем те çак чупава хастар хутшăнчĕç. Районти кашни ял тăрăхĕнчех сывă пурнăç йĕркине тытакансем кроса хутшăнма кăмăл турĕç, нумайăшĕ - çемйисемпех. Тĕп старт пуçланиччен райцентрти "Кĕтне" физкультурăпа спорт комплексĕн умĕнче пурте пĕрле зарядка турĕç. Ăна Пĕтĕм Раççейри "Единая Россия" партин "Çамрăк гварди" юхăмĕн активисчĕсем йĕркелерĕç. Кроса пур çын та хутшăнма пултарчĕ: ватти-вĕтти, çамрăкки-яшши... Дистанцие ача-пăча, аслă ỹсĕмрисем, арçынсемпе хĕрарăмсем, яш-кĕрĕмпе хĕр-упраç, ветерансем тухрĕç.

Ăмăрту яланхи пекех VIP-чупуран пуçланчĕ. Тĕрлĕ службăсен, учреждени ертỹçисемпе пĕрле район администрацийĕн пуçлăхĕпе Михаил Афанасьевпа Чăваш Республикин Патшалăх Канашĕн депутачĕ Петр Краснов та пĕр çаврăм чупрĕç. Ун хыççăн ытти ушкăнсем старта тăчĕç. Пĕтĕм Раççейри "Нацисен кросĕ" чупура ачасемпе çамрăксем ытларах пулчĕç. Çакă савăнтарать, вĕсем аслисенчен тĕслĕх илсе хăйсен сывлăхне пурнăç тăршшĕпех çирĕплетсе пырасса шанас килет. Уйрăмах Комсомольски 1-мĕш вăтам шкулĕн вĕренекенĕсем йышлăччĕ, вĕсен педагогĕсем те пысăк пĕлтерĕшлĕ мероприятирен юлман, йышпах ăмăртусене хутшăнчĕç, лайăх кăтартусемпе палăрчĕç.

Анчах çакнашкал сывлăх кунĕсене яланах пĕрисем çеç хутшăнни шухăшлаттарать. Райцентрта тĕрлĕ предприятипе организаци нумай, федераллă структурăсен филиалĕсем те пур. Вĕсен ĕçченĕсемшĕн сывă пурнăç йĕрки ют-шим? Малашнехи ăмăртусене ытларах çын хутшăннине курасчĕ. Кашни ушкăнра ăмăрт-са пĕтерсен çĕнтерỹçĕсене Дипломсемпе, парнесемпе чысларĕç. Çак кун стадиона тухнисем киле çĕкленỹллĕ кăмăлпа, ырă ĕмĕт-тĕллевпе утрĕç.