Спорт форумне хатĕрленсе. Аса илтеретпĕр, октябрĕн 9-11-мĕшĕсенче Чăваш Енре "Раççей - спорт çĕршывĕ" Пĕтĕм тĕнчери форум иртет. Сентябрĕн 22-мĕшĕнче республика Пуçлăхĕ Михаил Игнатьев ертсе пынипе йĕркелỹ комитечĕн ларăвĕ иртнĕ.

. Муниципалитетсен ĕçне чарса пымалла мар. Сентябрĕн 23-мĕшĕнче республика Пуçлăхĕ Михаил Игнатьев Чăваш Республикинчи вырăнти хăй тытăмлăх органĕсене тĕрĕслесе тата асăрхаса тăрассине тишкерекен ведомствосем хушшинчи комисси ларăвне ирттернĕ. Хăйĕн ум сăмахĕнче Михаил Васильевич тĕрĕслевпе асăрхав ĕçĕн муниципалитетсене хăйсен тивĕçĕсене пурнăçлама пулăшса пымаллине, вĕсен ĕçне чармалла маррине палăртнă.

. Массăллă спорта аталантарассипе - малта. Сентябрĕн 24-мĕшĕнче РФ Шалти ĕçсен министрĕ Владимир Колокольцев ертсе пынипе видеоконференци мелĕпе право йĕркине пăсакансемпе ĕçлекен çĕршыври профилактика комиссийĕн ларăвĕ иртнĕ. Чăваш Республики енчен унăн ĕçне тĕрлĕ официаллă çынсем хутшăннă. Ларура правăна пăсакансемпе профилактика мерисем ирттерме физкультурăпа спорт пулăшнине каланă. РФ спорт министрĕн çумĕ Наталья Паршикова Чăваш Енре массăллă физкультура мероприятийĕсене йĕркелесе ирттерессипе аван ĕçленине палăртнă.

. Ача сачĕсем уçăлаççĕ. 2014 çулхи сентябрĕн 1-мĕшĕ тĕлне республикăра 34 пин ача садике черетре тăнă, вĕсенчен 15,4 пинĕшĕ - çулталăк çурăран аслисем, 1,1 пин ача - виçĕ çултан аслисем. Кăçал республикăра 2616 вырăнлăх 14 ача сачĕ хута яма палăртнă. Янтă çуртсенче капиталлă юсав ĕçĕсем ирттернĕ май 1060 вырăн хатĕрлĕç, ытти мелсемпе - 340 вырăн.

. Пĕр çын пуçне çурт тăвасси ỹснĕ. Сентябрĕн 24-мĕшĕнче республика Пуçлăхĕ Михаил Игнатьев ЧР Министрсен Кабинечĕн ларăвне ирттернĕ. Унта строительствăпа архитектура министрĕ Олег Марков хăй ертсе пыракан отрасль 2011-2013 çулсенче мĕнле ĕçленипе паллаштарнă. Министр пĕлтернĕ тăрăх, асăннă çулсенче 2,5 млн ытла тăваткал метр пурăнмалли вырăн хута кайнă. Атăлçи федераци округĕпе илсен пĕр çын пуçне çурт тăвассипе пирĕн республикăн чи лайăх кăтарту. 2013 çул пĕтĕмлетĕвĕпе пĕр çын пуçне 0,67 тăваткал метр хута янă, кăçал ку кăтартăва татах ỹстерме палăртаççĕ.

. "Халăх асăрхавĕ" портал ĕçлеме пуçлать. 2014 çул вĕçлениччен республикăра "Халăх асăрхавĕ" портал ĕçлеме пуçлĕ. Çĕнĕ интернет-ресурс пулăшнипе кирек кам та коммуналлă пулăшусемпе, çыхăнупа, социаллă сферăпа, бизнеспа, экологипе, таврана тирпей-илемпе хăтлăх кỹрессипе тата инфратытăмпа, çулсемпе тата ял хуçалăхĕпе çыхăннă хăйне пăшăрхантаракан информацие республика Правительствине ярса пама пултарать.