Сентябрĕн 27-мĕшĕнче Шупашкарта "Cĕт фестивалĕ - 2014" иртнĕ. Мероприятие Чăваш Ен Пуçлăхĕ Михаил Игнатьев, ЧР Министрсен Кабинечĕн Председателĕн çумĕ - ял хуçалăх министрĕ Сергей Павлов, сĕт тирпейлекен наци пĕрлешĕвĕн правленийĕн председателĕ Андрей Даниленко тата официаллă ытти хăнасем пуçтарăннă.

Чăваш Ен Пуçлăхĕ Михаил Игнатьев пасарсенче хамăр тăрăхра туса кăларакан продукци çителĕклĕ, пахалăх енчен те çỹллĕ шайра пулнине каланă. "Эпир, туянакансем, яланах сĕт-çăва кам тирпейлесе кăларни çинчен ыйтма пултаратпăр. Кун пек чухне ытларах хыпара пĕлсе тăрсан, хамăра кирлĕ пек тавара туянăпăр. Сывлăхшăн усăллă сĕте туяннă чухне йăнăш тумăпăр", - тенĕ республика Пуçлăхĕ. Çавăн пекех вăл экономика тĕлĕшĕнчен сĕт-çу валли хывмалли инвестици вăхăчĕ 8-15 çул таранах çитме пултарни пирки палăртнă, сĕт-çу тирпейлессипе ĕçлекен предприятисене тав сăмахĕ каланă.

Сĕт тирпейлекенсен наци пĕрлешĕвĕн правленийĕн председателĕ Андрей Даниленко халăх сывлăхĕ çине республика ертỹлĕхĕ те пысăк тимлĕх уйăрнине каланă. Ачасен сывлăхне упрассипе сĕт-çăва кирлĕ пек пысăк шайра тирпейлесе кăларнин кăтартăвĕ куç кĕретех. Пахалăхлă таварсене тирпейлесе кăларассин кăтартăвĕпе Чăваш Ен ыттисенчен яланах çỹллĕ шайра тăнине асăннă.

Çулталăкне кашни ĕнерен 7 пин килограмм сĕт суса илме пултарнă ĕçченсене пысăк çитĕнỹсем тунăшăн республика Пуçлăхĕ наградăсем парса хавхалантарнă. Вĕсен йышĕнче пирĕн районти маттур дояркăсем пулни уйрăмах савăнтарать. "Асаново" ял хуçалăх кооперативĕнче тăрăшакансем - Наталья Александровна Белова, Людмила Ивановна Чижикова, Вера Александровна Яковлева - наградăсене тивĕçнĕ.

Çак кун Чăваш Республикин Министрсен Кабинечĕпе сĕт тирпейлекен наци пĕрлешĕвĕ хушшинче пĕр-пĕринпе килĕшсе ĕçлесе "Кунне - сĕт-çуран тунă виçĕ апат" проекта пурнăçласси çинчен ĕç хутне алă пусса çирĕплетнĕ. Асăннă фестиваль Чăваш Енре виççĕмĕш хут иртнĕ, кунта 8 предприяти хутшăннă. Халĕ Чăваш Енре сĕте тирпейлесе кăларассипе пурĕ 12 предприяти тимлет, вĕсем кăçал 111,1 пин тонна сĕт туяннă. Çулталăк пуçланнăранпа 78,9 пин тонна сĕт-çу продукцийĕ хатĕрленĕ.