Иртнĕ эрнере районти ветерансен совечĕсен председателĕсен черетлĕ канашлăвĕ иртрĕ. Унта район администрацийĕн пуçлăхĕ М.Р.Афанасьев, тĕп больница поликлиникин заведующийĕ Л.Галкина, РФ Пенси фончĕн районти управленийĕн начальникĕ С.Горбунов, социаллă хỹтлĕх пайĕн начальникĕ И.Никитина, социаллă страховани фончĕн тĕп специалисчĕ В.Тихонова, ветерансен совечĕн председателĕ Ю.Тимофеев хутшăнчĕç. Вĕсем Ваттисен кунне уявлассине тата ветерансене хумхантаракан ыйтусене сỹтсе яврĕç, кирлĕ йышăнусем турĕç. Районта пурăнакан ватăсене хумхантаракан ыйту сахал мар. Тивĕçлĕ медицина пулăшăвĕ илесси, вăхăтра сипленесси, путевкăсемпе тивĕçтересси, пенси ыйтăвĕ хумхантарать вĕсене. Сăмахран, поликлиника заведующийĕ пĕлтернĕ тăрăх, кăçал ветерансене тивĕçлĕ пулăшу парас тесе диспансеризаци ирттернĕ, республикăран килсе çитнĕ специалистсем те вĕсен сывлăхне тĕплĕн тĕрĕсленĕ.

Паянхи куна тĕп больницăра Аслă Отечественнăй вăрçă 22 ветеранĕ, 10 инваличĕ, 3775 ĕç ветеранĕ, 667 тыл ĕçченĕ, репрессиленĕ 34 çын учетра. Санаторипе курорт путевкисене илесси те хумхантарать ватăсене. Çакăн пирки тĕплĕнрех Ираида Никитинапа Валентина Тихонова каласа пачĕç. Сăмахран, 2013 çулта санаторисенче сипленме 43 путевка панă, кăçал çăмăллăхпа 26 çын усă курнă, сентябрĕн 23-мĕшĕ тĕлне 204 çын черетре тăрать. Çынсем "Чувашия", "Надежда", "Волжские зори", "Чувашия-курорт" санаторисенче каннă. Çавăн пекех 21-шĕ "Вега" центрта сывлăхне çирĕплетнĕ. Канма каяс текенсен районти социаллă хỹтлĕх пайне пымалла, документсене хатĕрлемелле, черете тăмалла. Пенси ыйтăвĕсем çине районти управлени начальникĕ Сергей Горбунов хуравларĕ. 2015 çултан пенсие çĕнĕ йĕркепе тỹлеме пуçлассине те каласа хăварчĕ вăл. Михаил Афанасьев районти социаллă-экономикăллă лару-тăрупа, кĕрхи ĕçсене мĕнле пурнăçланипе паллаштарчĕ. В.Герасимова, Н.Николаева, В.Микенинана Чăваш Республикин ветерансен совечĕн хисеп грамотисемпе чысларĕç.

- Октябрĕн 1-20-мĕшĕсенче районта Ваттисен кунне ирттерме палăртнă. Çак вăхăтра организацисемпе предприятисем, учрежденисем ватăсене чысласа уявсем ирттереççĕ. Çакна пурнăçлама район пуçлăхĕ ятарлă хушу кăларнă, график çирĕплетнĕ, - пĕлтерчĕ Юрий Тимофеев.