Пĕтĕм Тĕнчери "Раççей - спорт çĕршывĕ" спорт форумĕн иккĕмĕш кунне пĕтĕмлетсе Чăваш Республикин Пуçлăхĕ Михаил Игнатьев тата РФ спорт министрĕ Виталий Мутко пресс-конференци ирттерчĕç, журналистсен ыйтăвĕсем çине хуравларĕç. Пресс-конференци валли уйăрнă вăхăт кĕскерех пулнăран пур ыйтăва та уçăмлатма май килмерĕ. Апла пулин те, форума вĕсем туллин пĕтĕмлетрĕç, чи пĕлтерĕшлĕ мероприятисене уйрăммăн асăнчĕç. Сăмахран, Виталий Мутко Çĕнĕ Шупашкар хулинче лаша спорчĕн манежне уçма хутшăнни çинчен кăмăллăн каласа пачĕ.

- Лаша спорчĕн шкулĕнче спортăн Олимп тĕсĕпе - конкур енĕпе ĕçлĕç. Апла тăк Чăваш Енĕн малашне ку енĕпе палăрма шанчăк пур. Кунта ăста спортсменсем çитĕнеççех, - терĕ спорт министрĕ.

Çак кунсенче Шупашкар хулинче форум программипе килĕшỹллĕн 20 мероприяти иртнĕ: çавра сĕтелсем, конференцисем, мастер-классем, выставкăсем... Вĕсене массăллă информаци хатĕрĕсен 150 ытла представителĕ çутатнă. Раççей Президенчĕ çумĕнчи Физкультурăпа спорта аталантарас енĕпе ĕçлекен канаш ларăвĕ, паллах, тĕп вырăнта пулнă. Ларура 2006 çултан пуçланнă спортăн истори шайĕнчи тапхăрне пĕтĕмлетнĕ. Пирвайхи программăна йышăннăранпа çĕршывра пурăнакансем спортпа ытларах та ытларах туслашнă.

Малашне форума 2 çулта пĕрре ирттерме йышăннă. Вăл спорт аталанăвĕн ыйтăвĕсене, унăн çĕршыв пурнăçĕнчи пĕлтерĕшне сỹтсе явмалли тĕп площадка пулса тăрĕ. РФ спорт министрĕ Виталий Мутко ГТО комплексĕ халăхăн пысăк пайĕшĕн норма пулса тăмаллине, çитес çулах пĕтĕм шкулпа аслă вĕренỹ заведенийĕсенче ГТО нормативĕсене пурнăçламаллине, 2017 çултан тытăнса вара пĕтĕм çĕршывĕпех ăна пăхăнмаллине палăртса хăварчĕ.

Шупашкар хули спорт ăмăртăвĕсене ирттерессипе пысăк опыт пухни пирки те сăмах пулчĕ. Çав шутра - çăмăл атлетика чемпионачĕсем. Тĕп хуламăрта çăмăл атлетика енĕпе Европа Кубокĕ, 2016, 2018 çулсенче хăвăрт утакансен чемпионачĕсем иртмелли те çакнах çирĕплетет. Çитес çулсенче спорт резервне хатĕрлес енĕпе çине тăрсах ĕçлессине те палăртрĕ спорт министрĕ.

2018 çулта Раççейре иртекен футбол чемпионачĕ пирки каланă май Виталий Леонтьевич ют çĕршывсенчен килекен командăсене çирĕм регион йышăнассине пĕлтерчĕ. Пĕр командине шăпах Шупашкар йышăнĕ.

Виталий Мутко шантарсах каларĕ: маунтинбайк комплексне те, Пăр керменне те туса пĕтеретпĕр. Форума ирттерме Чăваш Ене ăнсăртран суйласа илменнине уйрăммăн палăртса хăварчĕ министр.

Михаил Игнатьева, республика правительствине хăнасене тарават йышăннăшăн, йĕркелỹ ĕçне лайăх пурнăçланăшăн тав турĕ. Чăваш Ен Пуçлăхĕ Михаил Игнатьев форума килсе çитнĕ хăнасене тав туса çапла каларĕ: "Эпир Чăваш Республикинче Пĕтĕм Раççейри тата Пĕтĕм тĕнчери ăмăртусене ирттерме яланах хатĕр".