Октябрĕн 30-мĕшĕнче район администрацийĕн ларусем ирттермелли залĕнче анлă канашлу иртнĕ. Тĕн пĕрлешĕвĕсемпе тата наци ĕçĕсемпе ĕçлекен Канашăн комисси ларăвне район администрацийĕн пуçлăхĕ Михаил Афанасьев, тĕн конфессийĕсен представителĕсем, право хуралĕн ĕçченĕсем, ял тăрăхĕсен пуçлăхĕсем хутшăннă.

Канашлура Чăваш Республикинчи тутарсен культурăпа наци автономийĕн районти уйрăмĕн ĕçĕ-хĕлне, вĕренекенсем хушшинчи толерантлă хутшăнăва сарассине, экстремизма хирĕç тăрассине, вырăнти хăй тытăмлăх органĕсем, культура, вĕренỹ учрежденийĕсем тĕн пĕрлешĕвĕсемпе килĕштерсе ĕçлемеллине сỹтсе явнă. Районта ытларах чăвашсем пурăнаççĕ. Пĕтĕмпе - 67,4 процент. Тутарсем - 27,4 процент, вырăссем- 4,5 процент. Тĕрлĕ тĕне ĕненнине пăхмасăрах вырăсĕ те, тутарĕ те, чăвашĕ те пĕр-пĕринпе килĕштерсе пурăнаççĕ, çемье çавăракансем те сахал мар.