Районти ял хуçалăх кооперативĕсемпе колхозсенче, фермер хуçалăхĕсенче вырма ĕçĕсем малалла пыраççĕ. Августăн 4-мĕшĕ тĕлне 3794 гектар çинчен 7599 тонна тырă тĕшĕлесе илнĕ. Хальлĕхе гектарăн вăтам тухăçĕ 20 центнерпа танлашать. Кĕрхи культурăсене акма 2340 гектар çĕр хатĕрленĕ, 300 гектар çинче çĕртме тунă.

Выльăх-чĕрлĕх валли апат хатĕрлес ĕç те чарăнмасть. Августăн 4-мĕшĕ тĕлне 7886 тонна утă, 22818 тонна сенаж, 2107 тонна силос янтăланă. Çав вăхăтрах "Комсомольские овощи" агрофирма 154 тонна çĕр улми (пĕр гектартан 223 центнер) кăларса пуçтарнă.

Паянхи куна пĕрчĕллĕ тата пăрçа йышши тырăсен чи пысăк тухăçĕ - "Урожай" колхозра, пĕр гектар пуçне 24,8 центнер. Шурутсем 345 тонна утă, 3510 тонна сенаж хатĕрленĕ. 70 гектар çĕртме тунă. Кĕрхи культурăсем валли 250 гектар çĕр хатĕрленĕ. "Слава картофелю" агрофирмăра та тухăç аван, унта гектартан 22,5 центнер тырă çапса тĕшĕлеççĕ.

"Рассвет", "Победа" ял хуçалăх кооперативĕсен ĕçченĕсем вара гектар пуçне 20 центнер тĕш тырă илеççĕ. Тукайсем 1073 тонна утă янтăланă, кĕрхи тырă акма 134 гектар çĕр хатĕрленĕ, 10 гектар çĕртме тунă.

"Победа" ЯХПК ĕçченĕсем те 100 тонна утă, 1300 тонна сенаж янтăланă, 80 гектар çĕр хатĕрленĕ.

Ш.ЗЕЙНУТДИНОВ