Районти "Çынсем тата çĕр" халăх музейĕнче тăтăшах тĕрлĕ выставкăсем йĕркелеççĕ. Акă, иртнĕ ытларикун "Елчĕк ăстисем" курав ĕçлеме тытăннă.

Курава Алена Полякова уçрĕ. Вăл Елчĕк тăрăхĕнчен килсе çитнĕ ăстаçăсемпе, вĕсен алă ĕçĕсемпе паллаштарчĕ. Светлана Голубева пушă вăхăтра çĕлеме юратать, саккас пур чухне кĕпе-йĕм те наччасрах çĕлеме пултарать. Унăн ĕçĕсем илемлĕ тата хăйне евĕрлĕ. Ăстаçă пусма татăкĕсенчен çав тери илемлĕ минтер пичĕсем, вырăн, сĕтел виттисем хатĕрлет. Çавăнпа пĕрлех вăл канзаши техникăпа усă курса тĕрлĕ тĕслĕ хăюсенчен (лентăсенчен) çеçкесем тăвать, вĕсемпе ободоксене, тата ытти япаласене илемлетет. Светлана Васильевна мастер-класс ирттерме те вăхăт тупрĕ. Пухăннисем çеçкесем тума вĕренчĕç. Вăл сувенирлă пĕчĕк çăм атăсем те ăсталать.

Тепĕр ăстаçă - Елчĕк вăтам шкулĕн педагогĕ Ирина Егорова. Вăл технологи, черчени, рисовани предмечĕсене вĕрентет. Пушă вăхăтра вĕт шăрçаран тĕрлĕ ỹкерчĕксем тĕрлет. Курава пуçтарăннисем Ирина Вячеславовна ĕçĕсемпе куç тулли киленчĕç. Çав тери илемлĕ ỹкерчĕксемпе кăсăкланнăран, Ирина тĕрлеме мĕнле вĕреннипе те интересленмесĕр чăтаймарĕç. Вăл темиçе çул каялла ачасен ĕçĕсемпе выставкăна хутшăннă. Шăпах унта пĕр хĕрарăм вĕтĕ шăрçаран хатĕрленĕ ỹкерчĕке курнă та, мĕнле тĕрлемеллине ыйтса пĕлнĕ. Унтанпа Ирина Вячеславовна алли витĕр вун-вун ỹкерчĕк тухнă.

Елчĕк ен ăстисен куравĕ пĕр уйăх пулĕ. Унпа кашниех паллашма пултарать. Курмалли, тĕлĕнмелли вара пурах.

Н.БЕЛКОВА