Раштавăн 25-мĕшĕнче эпир, Комсомольски районĕнчи 7 ача: Ирина Копташкина (Асанкасси), Валерия Иванова (Хирти Явăш), Кристина Степанова (Анат Тимĕрчкасси), Алексей Тарасов (Шурут), Наталия Воробьева (Александровка), Анжелика Потапова (Хырай Ĕнел), Кирилл Денисов (Комсомольски) Шупашкарта "Чăваш елки - 2015" уявра пултăмăр. Уява вĕренỹ отличникĕсем, спортра çитĕнỹ тунисем, конкурссемпе олимпиадăсенче çĕнтернисем хутшăнчĕç.

Наци конгресĕн çуртĕнче чăвашсен авалхи пурнăçĕнче пулса курнăнах туйăнчĕ: савăт-сапа, тăм теттесем, тумтирсем.

Чăваш елки Çĕнĕ çул асамлăх çуртĕнче иртрĕ. Кашниех уява хитре, чăваш наци тумĕпе килнĕ. Эпир малтанах "Çапкаланчăк" юмах куртăмăр, чăваш ачисен сăвви-юррипе, ташшипе паллашрăмăр. Елка тавра карталанса юрăсем юрларăмăр, ташларăмăр, вăйăсем вылярăмăр. Уява чăвашла йĕркелени кăмăла çĕклерĕ. Çитес çул хуçи Упăте пире "Упăте ташшине", "Банан ташшине" вĕрентрĕ. Хĕл Мучипе Юрпике килсен уяв тата та илемленчĕ. Эпир пурте елка тавра тулли кăмăлпа савăнтăмăр. Туп-тулли хутаç парне те пирĕн чуна савăнтарчĕ.

Ентешсене - Валери Туркайпа Александр Капитонова - чăваш елкине çитсе курма май туса панăшăн тав сăмахĕ калатпăр.

И.КОПТАШКИНА