Февралĕн 21-мĕшĕнче районти "Кĕтне" физкультурăпа спорт комплексĕнче ирĕклĕ майпа кĕрешекенсен пысăк ăмăртăвĕ иртрĕ. Турнира пуçласа районта классикăллă тата ирĕклĕ майпа кĕрешекенсен секцине йĕркелесе янă, пĕрремĕш кĕрешỹçĕсене хатĕрленĕ ентешĕмĕр Петр Георгиевич Матросов ячĕпе ирттерчĕç. Кăçалхипе асăннă тупăшу 5-мĕш хут иртрĕ. Петр Матросов Тукай ялĕнче çуралса ỹснĕ, Мускав хулинче тĕпленнĕ. Спорт ветеранĕ, СССР спорт мастерĕн кандидачĕ 81 çула çитнĕ пулсассăн та, инçе çула кĕскетсе тăван ене васкать. Кăçал та çаплах пулчĕ, Петр Георгиевич турнира хутшăнакансене ăшшăн саламларĕ, спорта юратма, вăй-хала çирĕплетме чĕнсе каларĕ.

Кăçалхи ăмăртăва республикăри 12 районти, Мордва Республикинчи чи ăста спортсменсем килсе çитрĕç. Икĕ кавир çинче150 яхăн кĕрешỹçĕ вăй виçрĕ. Арçын ачасем 11 виçере, хĕрсем тата арçынсем 2 виçере тупăшрĕç.

Район спортсменĕсем тĕрлĕ виçере вăй виçрĕç, вĕсенчен нумайăшĕ çĕнтерỹçĕсен йышне кĕме пултарчĕ. Акă, 26 килограмлă виçере Андрей Тимофеев (Анат Тимĕрчкасси) 2-мĕш вырăна тивĕçрĕ. 46 килограмлисем хушшинче Даниил Митюков (Асанкасси) 3-мĕш пулчĕ. Дмитрий Андреев (Анат Тимĕрчкасси), Станислав Пыркин (Асанкасси) 50 килограмлисем хушшинче 1-2-мĕш вырăнсене, 54, 58, 63 килограмлисем хушшинче Артем Катмаковпа Константин Калашников, Александр Яковлев (Асанкасси) 2-мĕш вырăнсене çĕнсе илчĕç. Евгений Козлов (Анат Тимĕрчкасси) 63 килограмлă виçере - иккĕмĕш, Роман Козлов, Ярослав Христофоров (Анат Тимĕрчкасси) 69 килограмлă виçере 2-3-мĕш вырăнсене тухрĕç. Хĕрсенчен Виктория Карпова (Асанкасси) çĕнтерỹçĕсен йышне лекме пултарчĕ. Асанкасси хĕрĕ Снежана Школьникова 56 килограмлă виçере пĕрремĕш пулчĕ.

Ирĕклĕ майпа кĕрешекенсен ăмăртăвĕ чăннипех те хĕрỹ иртрĕ. Куракансем кăшкăрса хавхалантарчĕç, кашниех çĕнтерме ăнтăлчĕ. Чи маттуррисем те хăюллисем çĕнтерỹçĕсен йышне лекрĕç, парнесене тивĕçрĕç. Ăмăртăва хутшăннисене, ăна йĕркелекенсене, пулăшу кỹнисене кăçал ятарлă парнесемпе чысларĕç. Андрей Тимофеева чи çамрăк спортсмен тесе палăртрĕç. Вика Карпова çĕнтерме ăнтăлакан ята тивĕçрĕ. Спорта аталантарма пысăк тỹпе хывнăшăн Александр Ченакина, ирĕклĕ майпа кĕрешекенсене хатĕрленĕшĕн Геннадий Петухова, турнира çỹллĕ шайра йĕркелесе ирттернĕшĕн Валерий Денисова палăртса хăварчĕç.

Петр Георгиевич Матросов 1935 çулхи январĕн 12-мĕшĕнче Тукай ялĕнче çуралса ỹснĕ. Аслă Чурачăкри вăтам шкултан вĕренсе тухсассăн, Куйбышев (Самар) хулинчи ял хуçалăх институтне вĕренме кĕнĕ. Вĕреннĕ вăхăтра бокс секцине çỹренĕ, тĕрлĕ ăмăртусене хутшăннă. 1959 çулта тăван ене таврăнса агрономра ĕçлеме тытăннă. Çак вăхăтра вăл ялти çамрăксене спортпа тата ытларах туслаштарнă. Петр Георгиевич Комсомольски вăтам шкулĕнче физкультура учителĕ пулса ĕçленĕ. Ачасене ирĕклĕ майпа кĕрешме вĕрентме тытăннă, хăйĕн ăсталăхне ỹстернĕ. 1965 çулта Петр Георгиевич СССР спорт мастерĕн кандидачĕ ята тивĕçнĕ. Вăл сакăр хутчен республика чемпионĕ пулнă.

1969 çулта Петр Георгиевич Мускав хулине куçнă, РСФСР профессиллĕ вĕренỹ патшалăх комитечĕн аслă инженерĕнче тăрăшнă.

1988-1991 çулсенче вăл Мозамбик республикинчи педагогикăпа индустри институтĕнче ĕçленĕ. Тăрăшнă вăхăтра 56 пичет изданийĕ хатĕрленĕ.

А.ЕФРЕМОВА