Март уйăхĕн пуçламăшĕнче тĕп хуламăрта "Вырăнти тавар тăваканăн кунĕ" ярмăркка ĕçлеме пуçланăччĕ. Асăннă ярмăрккана Çĕрпỹ районĕнчи вырăнти производство представителĕсем уçнă. Кашни шăматкунах хулара пурăнакансемпе хăнасен республикăри районсен таварĕсемпе паллашма тата вĕсене туянма май пулнă. Ярмăркка ĕçлеме пикеннĕренпе пурĕ пĕрле 1,5 тонна аш-какай, 8,3 тонна çĕрулмипе пахчаçимĕç, 1,180 тонна пулă, 500 кг пыл, 1 тонна сĕт-çу продукцийĕ сутăннă. 

Акă, мартăн 26-мĕшĕнче ярмăрккана Комсомольски районĕнчи предприятисем те хутшăннă. "Слава картофелю" агрофирмăн, райпон, çăкăр завочĕн, хатĕрлев кантурĕн, "Кооператор" ОООн, "Молцентр" кооперативăн, Çĕнĕ Кипеçри сĕт-çу завочĕн представителĕсем, пыл хурчĕсен кантурĕн специалисчĕ М.Г. Пильщикова хăйсен продукцине халăха сĕннĕ.

Ярмăрккана ир-ирех пуçтарăннă халăха çỹлерех асăннă производительсем вăрлăхлăх тата апатлăх çĕрулми, тырă (сĕлĕ, урпа, тулă), аш-какай, тĕрлĕ-тĕрлĕ кукăль-булка, минераллă тата пылак шывсем, сĕт продукцийĕ (пакетланă сĕт, кефир, хăйма), 15 тĕрлĕ сырпа хурт-хăмăр продукцине сĕннĕ. Палаткăри çимĕçсемпе халăх хапăлласах сăйланнă, вĕсем лавккаринчен самай йỹнĕрех пулнипе наччасрах туянса та пĕтернĕ.

Унсăр пуçне пухăннисене Комсомольски районĕн пултарулăх коллективĕ савăк кăмăл-туйăм парнеленĕ. М.Илларионован, В.Тимофееван, Л.Носован, Е.Шуряшкинан, Елена тата Сергей Просвирновсен юррисемпе шỹчĕсем таврана сарăлнă, ярмăрккана йыхравланă.