Ялсенчи çамрăксем хушшинче иртекен "Чăваш Енри шкулсен волейбол лиги" 7-мĕш чемпионатăн финалĕнче Комсомольски 2-мĕш вăтам шкулĕн команди кĕмĕл призер ятне çĕнсе илме пултарчĕ.

Пуш уйăхĕн 22-мĕшĕнче Канаш районĕнчи Шăхасан ялĕнчи ачасемпе çамрăксен "Импульс" спорт шкулĕнче иртнĕ чемпионатра Шупашкар, Комсомольски, Патăрьел тата Канаш районĕсен командисем тупăшрĕç.

Шупашкар районĕнчен килнĕ волейбол команди пуринчен те активлăрах пулса Чăваш Республикинчи ялсенчи çамрăксен командисем хушшинче чемпион ятне тивĕçрĕ. Пирĕн район волейболисчĕсем пĕр командăна çеç выляса ярса иккĕмĕш вырăн йышăнчĕç. Виççĕмĕшĕсем Канаш районĕн çамрăкĕсем пулчĕç.

Ю.БОРОВКОВ