Вакансисен ярмăрккине ĕçсĕррисемпе ăна шыракан граждансемшĕн çывăх вăхăтрах ĕç тупса парассишĕн йĕркелеççĕ. Ун урлах çынсем пулас ĕç вырăнĕ тата шалу виçи пирки те тĕплĕнрех пĕлеççĕ. Асăннă мероприяти мартăн 27-мĕшĕнче Комсомольски районĕнчи ĕçпе тивĕçтерекен центрта пулса иртрĕ.

Унта районти 3 организаци хутшăнчĕ - В.Н.Спиридонов предприниматель, Н.В.Васильевпа "Ылтăн пучах" фермер хуçалăхĕсем. Ĕç шыракансем пирки калас пулсан, ярмăрккана пурĕ 15 çын килсе çитрĕ: вĕсенчен 7-шĕ - ĕçсĕррисен шутĕнчен, ыттисем - 18 çул тултарман яшсем. Пухăннисем кашниех анкета тултарнă хыççăн ĕç паракан организацисен представителĕсемпе ятарлă калаçусем ирттерчĕç. Граждансене центр специалисчĕсем вара кирлĕ сĕнỹ-канаш парса пулăшса пычĕç, ĕç рынокĕнчи лару-тăрупа та паллаштарчĕç. Ярмăрккана килнĕ 3 çынна вăхăтлăх ĕçпе тивĕçтерчĕç, çул çитмен 5 çамрăк (14-18 çулсенче) Спиридонов предприниматель патĕнче ĕçлеме килĕшрĕ.

К.КОКШИН