Андрей Павелин чăваш алфавитне телефонпа вĕренмелли программа шухăшласа кăларнă. Ăна ку ĕçре Шупашкарти "Кванториум" технопарка çỹрекен ачасем те пулăшнă.

Вĕренекенсем малтан проект хатĕрленĕ. Унтан ăна компьютер чĕлхи çине куçарнă. Ку ĕçе вĕсем ака уйăхĕнче çеç тума тытăннă. Программăна 3-6 çулсенчи ачасем валли хатĕрленĕ. Телефонри сарăм саспаллисене, хисепсене, тĕссене чăвашла вĕрентет.

Ку сарăмпа шкулта та усă курма меллĕ, чăваш чĕлхи урокĕсене кăсăклă ирттерме пулăшĕ. Çавăнпа ку проекта Чăваш Республикин Вĕренỹ министерствине сĕнсе пăхасшăн. Халĕ ачасен сарăма чăвашла калаçтарма вĕрентмелли çеç юлнă. Чăвашла сарăма çитес вăхăтра пурте телефон çине лартма пултарĕç.