Çуллахи кунсенче чылайăшĕ çутçанталăкпа киленме юратать. Анчах та вăрман-çаранра асăрханулăх çинчен те манмалла мар.

Кăçал республикăра çĕлен сăхнипе больницăна 11 çын пынă, вĕсенчен иккĕшĕ - ачасем.

Иртнĕ кунсенче Патăрьел районĕнчи пĕр ялта 3 çулхи ачана хура çĕлен сăхнă. Ку инкек пахчара пулнă. Ашшĕ-амăшĕ пепкине çĕлен тапăннине вăхăтра курса ĕлкĕреймен пулсан инкек вилĕмпех вĕçленĕччĕ те-и тен? Ăна çийĕнчех район больницине илсе кайнă. Тухтăрсем тĕрĕсленĕ хыççăн ачана Шупашкара хула больницине ăсатнă. Шăмăршă районĕнчи Карапай Шăмăршăра пурăнакан 80 çулхи хĕрарăма та çĕлен сăхнă. Ăна Патăрьел район больницинчи реанимаци уйрăмне илсе çитернĕ.