Декабрĕн 23-мĕшĕнче Правительство çуртĕнче ЧР Министрсен Кабинечĕн Председателĕн çумĕ - ЧР Пуçлăхĕн Администрацийĕн ертỹçи Юрий Васильев тата Министрсен Кабинечĕн Председателĕн çумĕ - ял хуçалăх министрĕ Сергей Артамонов кил хуçалăхĕсенче туса илекен сĕтĕн сутлăх хакне çỹллĕ шайра тытса тăрас ыйтупа канашлу ирттернĕ.

- Халăхран кулма юрамасть, сĕт хакне чакармалла мар, - тенĕ Юрий Васильев канашлăва хутшăннисене.

Канашлăва район администрацийĕсен пуçлăхĕсем, сĕте тирпейлекен предприятисен тата ăна кил хуçалăхĕсенчен пуçтаракан организацисен представителĕсем хутшăннă. Сергей Геннадьевич ял-йышран, ял хуçалăх организацийĕсемпе фермерсенчен пухакан сĕт хакĕпе, унран юр-вар хатĕрлесе сутассипе çыхăннă ыйтусене тишкернĕ, муниципалитет ертỹçисенчен вĕсене татса памашкăн хастар хутшăнма ыйтнă.

Декабрĕн 22-мĕшĕ тĕлне республикăри кил хуçалăхĕсенчен пуçтаракан кашни литр сĕтĕн вăтам хакĕ 18,9 тенкĕпе танлашнă. Палăртмалла, ку çулталăк каяллахинчен 3 тенкĕ е 13,7 процент сахалрах. Юлашки эрнере сĕт хакĕ чакнă тăрăхсем хушшинче Красноармейски, Элĕк, Йĕпреç, Хĕрлĕ Чутай, Муркаш, Шăмăршă районĕсемпе пĕрлех Комсомольски те пур. Юрий Васильев халăхран продукци пухакансене сĕтĕн сутлăх хакне çитес çул пĕр шайра тытса тăма чĕнсе каланă.

Канашлăва хутшăннисем сĕт пухассипе, пахалăхĕпе, унран продукци хатĕрлессипе çыхăннă чăрмавсене уççăн сỹтсе явнă, вĕсене сирмелли çул-йĕре кăтартнă. Çакна палăртмалла - патшалăхпа муниципалитет органĕсем 2018 çулта кил хуçалăхĕсенче сĕт туса илекенсен интересĕсене хỹтĕлессине, тивĕçлĕ ĕçлемеллине палăртаççĕ.