Ку йышши штабсем республикăри чылай районсемпе хуласенче уçăлнă та. Июлĕн 15-мĕшĕнче район центрĕнчи çын йышлă çÿрекен вырăнта — Канаш урамĕн 26-мĕш çуртĕнче — черетлĕ халăх штабĕ ĕçлеме пикенчĕ. Халĕ кунта районта пурăнакан кирек кам та Олег Николаевшăн алă пусма пултарать.
Халăх штабĕ уçăлнă кун Чăваш Республикин Пуçлăхĕн тивĕçĕсене вăхăтлăх пурнăçлакан Олег Николаевшăн алă пусма районти хисеплĕ çынсем кăмăл турĕç. Вĕсем хăйсен шухăшне Олег Николаева шаннипе тата вăл суйлава каякан тĕллевлĕ программа республикăн социаллă-экономикăллă аталанăвне ырă енне улăштарас енĕпе çыхăннипе çирĕплетрĕç.
Олег Николаевшăн чи пирвай алă пусакансенчен пĕри районти обществăлла канаш председателĕ, агропромышленноç комплексĕн ветеранĕ Илдус Миннетуллин пулчĕ. Вăл хăйĕн шухăшне пĕлтерсе çапла пĕтĕмлетрĕ:
— Паян республикăна ертсе пыракан Олег Николаев хăйĕн программинче яла аталантарассине пысăк тимлĕх уйăрнине ырлатăп. Ял хуçалăх отраслĕнче чылай çул ĕçленĕрен агропромышленноç сферине пулăшу кÿни çав тери пĕлтерĕшлĕ тесе шутлатăп. Сăмахран, Олег Алексеевич тăрăшнипе ялсенче пурăнакансем сăвăнакан кашни ĕнешĕн 2300 тенкĕ, 3300 тенкĕ тата 4300 тенкĕ илме пултарчĕç. Çавăн пекех ял хуçалăх техники туянма уйăракан субсиди виçине ÿстернине, вырăнта тавар туса кăларакансен правине хÿтĕленине епле ырламăн;
Комсомольски ял тăрăхĕн пуçлăхĕ Мария Илларионова та халăх штабне çитсе Олег Николаевшăн алă пусрĕ. Унăн кандидатурине ырланă май çапла пĕлтерчĕ:
— Олег Алексеевич Чăваш Республикин Пуçлăхĕн тивĕçĕсене пурнăçлама тытăнсанах, малтанхи уйăхсенчех, пандеми вăхăтĕнче, хăйĕн тĕслĕхĕпе çынсене пĕр тытăма пĕрлештерме пултарнине кăтартса пачĕ. Çакă пĕтĕмпех пуласлăхпа тата пулас ăрăвăн пурнăçне лайăхлатассипе çыхăннă.
— Эпир Олег Николаева ĕçре курма тата хаклама ĕлкĕртĕмĕр. Вăл пуçарнипе районсене субсиди уйăрасси 3,5 млрд тенкĕ ÿсрĕ, Чăваш автономи облаçне туса хунăранпа 100 çул çитнĕ май тавралăха илем кĕртме, ĕçсене пурнăçлама ял-саласене укçа-тенкĕ уйăрчĕç. Эпĕ шанатăп: эпир Олег Николаевпа тата унăн командипе пĕрле тухăçлă ĕçлĕпĕр. Çавна май эпир унăн кандидатурине ырласа алă пусатпăр, — пĕлтерчĕ Людмила Михайлова.
Чăваш Республикин Пуçлăхĕ пулас шухăшлисем паянхи куна обществăлла йышăну пÿлĕмĕсем уçасса пĕлтермен-ха. Вĕсем вырăнти муниципалитетсен депутачĕсемпе тĕл пулаççĕ. Сăмахран, иртнĕ эрнере Николай Степанов /»Российская партия пенсионеров за социальную справедливость»/, Александр Андреев /КПРФ/, Сергей Матвеев /»Патриоты России»/, Андрей Ильдеменов /уйрăм предприниматель/ тата Юрий Шакеев /граждăнла активист/ пирĕн районта пулчĕç.
Аса илтеретпĕр, Чăваш Республикин Пуçлăхĕн суйлавĕ сентябрĕн 13-мĕшĕнче иртет. Паянхи куна республикăри Тĕп суйлав комиссийĕ пĕлтернĕ тăрăх, регион ертÿçи пулма 12 çын кăмăл тунă.
А.АНТОНОВА

АУ «Редакция Комсомольской районной газеты «Каçал ен» («Кошелеевский край»)