Çулпа çул чăнласах та пĕр килмест иккен. Çакна кăçалхи çанталăк тÿрремĕнех çирĕплетрĕ. Хуçалăхсем çуракине кая юлса тухаççĕ.
Пĕлтĕрхипе танлаштарсан çуркунне икĕ-виçĕ эрне кая юлса пырать. Енчен те иртнĕ çул ку вăхăтра хуçалăхсем кĕрхи культурăсене апатлантарнă пулсан, кăçал уй-хир хĕлĕн тарăн ыйхинчен вăранайман-ха. Тавралла юр выртать. Ку ял хуçалăх предприятийĕсемпе хресчен-фермер хуçалăхĕсен ĕçченĕсем пушă лараççĕ тенине пĕлтермест, паллах. Машинăпа трактор паркĕсенче тата кĕлет-ангарта хĕрÿ ĕç вĕрет. Механизаторсем хăйсене шанса панă «хурçă учĕсене» тата вĕсен çумне çаклатса ĕçлеттермелли агрегатсене тепĕр хутчен тĕрĕслесе хатĕррисен ретне лартаççĕ, бригада ĕçченĕсем вăрлăха акана тухиччен тасатса тирпейлеççĕ, кунсерен тенĕ пекех района удобрени тата çунтармалли-сĕрмелли материалсем турттаракан автомашинăсем килсе тăраççĕ. Ку — пирĕн куç тĕлне пулман ĕçсем, вĕсем еплерех пулса пынине специалистсем тăтăшах вырăна тухса тĕрĕслеççĕ.
Çак тĕллевпе район администрацийĕн специалисчĕсем тĕл пулусем ирттерсе хуçалăхсенчи ĕç-хĕлпе паллашаççĕ. Çак кунсенче çеç «Восток», «Пайгас», «Победа», «Слава» ЯХПК-сен, «Дубовка» ОООн, Минатуллин фермер хуçалăхĕн ертÿçисемпе тĕл пултăмăр.
Асăннă кашни хуçалăхрах хатĕрленÿ ĕçĕсем пыни кăмăл-туйăма çĕклет. Тĕслĕхрен, «Восток» ЯХПК 1308 гектар çинче ял хуçалăх культурисем туса илет, вĕсенчен 983 гектарĕ — тĕш тырă уйĕсем. Кĕрхи культурăсем 300 гектар йышăнаççĕ. Çурхисене 683 гектар çинче акса хăварма палăртаççĕ. Вăл шутран 400 гектар урпа, 233 гектар тулă, 50 гектар сĕлĕ. Çавăн пекех куккурус 100 гектар, нумай çул ÿсекен курăксене 175 гектар, пĕр çул ÿсекеннисене 50 гектар акма планланă. Çуракине вăхăтра тата тухăçлă ирттерме вăрлăх тата удобрени çителĕклĕ хатĕрленĕ. Вăрлăха çĕнетес тĕллевпе пĕлтĕр элита кÿрсе килнĕ. Мехпарк çĕнĕ «Беларус-1523» тракторпа, çĕнĕ йышши курăк çулакан, утă тата улăм тюклакан, курăк пуçтаракан агрегатсемпе пуянланнă.
Минатуллинăн фермер хуçалăхĕнче кăçал 150 гектар çинче çурхисене /120 гектар урпа тата 30 гектар тулă/ акма палăртаççĕ. Кĕрхи культурăсем 170 гектар йышăнаççĕ. 65 тонна удобрени кÿрсе килнĕ, элита вăрлăхĕ туяннă.
«Слава» ЯХПК 1107 гектар çинче ял хуçалăх культурисем çитĕнтерет. Кĕркунне 120 гектар çĕре вăрлăхпа «пуянлатса» хăварнă, çуркунне 384 гектар пĕрчĕллĕ тата пăрçа йышши культурăсем акма палăртать. Çуракинче усă курмалли агрегатсене юр айĕнчен кăларнă. Механизаторсен звени ял хуçалăх техникине юсаса хатĕррисен ретне лартать. Ку енĕпе вĕсем çеç мар, ытти хуçалăхсем те тăрăшса ĕçлеççĕ, техникăна çуракине хатĕрлесси çине пур çĕрте те пысăк тимлĕх уйăраççĕ. Ятарлă комисси ĕçе кÿлĕннĕ ĕнтĕ.
Çуркунне тăрăшса ĕçлесессĕн, акана вăхăтра пурнăçласассăн паха тухăç илесси пулатех. Ял хуçалăхĕнче вара кашни ĕçе вăхăтра пурнăçлани паха.
А.СЕЛИВАНОВ,
район администрацийĕн ял хуçалăх пайĕн начальникĕн тивĕçĕсене вăхăтлăх пурнăçлаканĕ